ନୂଆଦିଲ୍ଲୀ,୨/୦୪: ଆଜିଠାରୁ ନୂଆ ଶୁଳ୍କ ନୀତି ଲଗାଇବାକୁ ଯାଉଛି ଆମେରିକା । ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଘୋଷଣା ମୁତାବକ, ଯେଉଁ ରାଷ୍ଟ୍ର ଆମେରିକା ଉପରେ ଯେତିକି ଶୁଳ୍କ ଲଗାଇବ ଆମେରିକା ମଧ୍ୟ ସମାନ ମାତ୍ରାରେ ଟିକସ କଷିବ । ଏପ୍ରିଲ ୨, ଆମେରିକାର ଲିବରେସନ୍ ଡେ ସେଲିବ୍ରେସନ୍ ସହ ଏହି ନୂଆ ଶୁଳ୍କ ନୀତି ଲାଗୁ କରିବାକୁ ଘୋଷଣା କରିଥିଲେ ରାଷ୍ଟ୍ରପତି ଟ୍ରମ୍ପ । ଆମେରିକାର ଏହି ପଦକ୍ଷେପ ବିଶ୍ବ ଅର୍ଥନୀତି ଉପରେ ବଡ଼ ପ୍ରଭାବ ପକାଇପାରେ । ତାଙ୍କର ଏହି କଡ଼ା ଶୁଳ୍କ ନୀତି ବିଶ୍ବ ଅଭିବୃଦ୍ଧିକୁ ଦୋହଲେଇ ଦେଇପାରେ । ମୁଦ୍ରାସ୍ପୀତି ବା ଦରଦାମକୁ ତେଜିବା ସହ ବିଶ୍ବକୁ ଏକ ଆର୍ଥିକ ବିପର୍ଯ୍ୟୟ ଆଡ଼କୁ ଠେଲି ଦେବ ବୋଲି ଆଶଙ୍କା କରାଯାଉଛି । ଆଷ୍ଟନ୍ ୟୁନିଭର୍ସିଟି ପକ୍ଷରୁ କରାଯାଇଥିବା ଏକ ଅଧ୍ୟୟନ ଅନୁସାରେ, ଟ୍ରମ୍ପଙ୍କ ପ୍ରସ୍ତାବିତ ୨୫ ପ୍ରତିଶତ ଶୁଳ୍କ ଯୋଗୁଁ ବିଶ୍ବ ଅର୍ଥନୀତିରୁ ୧.୪ ଟ୍ରିଲିଅନ ଡଲାର ଆୟ ପ୍ରଭାବିତ ହେବ ।ଏହା ବିଶ୍ବ ବାଣିଜ୍ୟକୁ ବ୍ୟାପକ ପ୍ରଭାବିତ କରିବ ବୋଲି ଆଶଙ୍କା କରାଯାଉଛି । ଏହାଦ୍ୱାରା ଭାରତ, ବ୍ରିଟେନ, ଜାପାନ ଏବଂ ଦକ୍ଷିଣ କୋରିଆ ଆଦି ରାଷ୍ଟ୍ର ଗୁଡିକର ଅର୍ଥନୀତିରେ ପରବର୍ତ୍ତନ ପରିଲକ୍ଷିତ ହୋଇପାରେ।