ଭୁବନେଶ୍ୱର,୦୫/୦୪: ଆଜି ପବିତ୍ର ଅଶୋକାଷ୍ଟମୀ । ଅଣଲେଉଟା ରଥରେ ଚଢ଼ି ମାଉସୀଘର ଯିବେ ମହାପ୍ରଭୁ ଶ୍ରୀଲିଙ୍ଗରାଜ । ରଥରେ ଭକ୍ତ ଓ ଶ୍ରଦ୍ଧାଳୁଙ୍କୁ ଦର୍ଶନ ଦେବେ ରାଜଧାନୀର ଆରାଧ୍ୟ ଦେବତା । ଭଗବାନ ଓ ଭକ୍ତଙ୍କ ମହାମିଳନରେ ଉଛୁଳି ଉଠିବ ଏକାମ୍ର କ୍ଷେତ୍ର । ହରିବୋଲ ଓ ହୁଳହୁଳି ଶବ୍ଦରେ ପ୍ରକମ୍ପିତ ହେବ ପରିବେଶ । ‘ପାପବିନାଶକାରୀ ଯାତ୍ରା’ ଭାବେ ଜଣାଶୁଣା ଏହି ରଥଯାତ୍ରା ଦେଖିବାକୁ ରାଜଧାନୀରେ ପ୍ରବଳ ଉତ୍ସାହ ସୃଷ୍ଟି ହୋଇଛି । ଏଥିପାଇଁ ମନ୍ଦିର ପ୍ରଶାସନଠାରୁ ଆରମ୍ଭ କରି ବିଏମ୍ସି ଓ ପୁଲିସ ପ୍ରଶାସନ ସମସ୍ତେ ପ୍ରସ୍ତୁତି ଶେଷ କରିଛନ୍ତି । ଅପରାହ୍ଣ ସାଢ଼େ ୩ଟାରେ ରଥ ଟଣା ହେବ ବୋଲି ନୀତି ନିର୍ଘଣ୍ଟ କରାଯାଇଛି । ଭୋର୍ ୫ଟାରେ ଠାକୁରଙ୍କ ଆଳତି ଅବକାଶ ନୀତି ସମ୍ପନ୍ନ ହୋଇଛି । ସାଢ଼େ ୫ଟାରୁ ଘଣ୍ଟାଏ ପର୍ଯ୍ୟନ୍ତ ଠାକୁରଙ୍କ ସାହାଣମେଲା ଦର୍ଶନ ଦେଇଛନ୍ତି । ଅନ୍ୟାନ୍ୟ ପୂଜାନୀତି ବିଧିମତେ ସମ୍ପନ୍ନ ହୋଇ ମଧ୍ୟାହ୍ନ ୧୨ଟାରୁ ସାଢ଼େ ୧୨ଟା ମଧ୍ୟରେ ମହାପ୍ରଭୁଙ୍କ ଯାତ୍ରା ପୂଜା ସମାପନ ହେବ । ସାଢ଼େ ୧୨ଟାରୁ ସାଢ଼େ ୧ଟା ମଧ୍ୟରେ ମହାପ୍ରଭୁ ରଥକୁ ପହଣ୍ଡି ବିଜେ କରିବେ । ରଥ ବିଜେସ୍ଥଳୀରେ ଠାକୁରଙ୍କ ପୂଜାର୍ଚ୍ଚନା ନୀତି କାର୍ଯ୍ୟ ଦୁଇ ଘଣ୍ଟା ମଧ୍ୟରେ ସାରି ରଥ ଟଣା ପ୍ରସ୍ତୁତି ଆରମ୍ଭ ହେବ । ଚାର ଖୋଲା ହୋଇ ସାଢ଼େ ୩ଟାରେ ରଥ ମାଉସୀମା’ ଅଭିମୁଖେ ଗଡ଼ିବ । ରାମେଶ୍ୱର ମନ୍ଦିରରେ ରଥ ଲାଗିବା ପରେ ଠାକୁର ବିଜେ କରି ସାଢ଼େ ୭ଟାରେ ଅନ୍ୟାନ୍ୟ ନୀତି କରାଯିବ ।
ମହାପ୍ରଭୁ ଲିଙ୍ଗରାଜଙ୍କ ରୁକୁଣା ରଥଯାତ୍ରା ଅବସରରେ ମରିଚି କୁଣ୍ଡରୁ ପବିତ୍ର ଜଳ ସଂଗ୍ରହ କରାଯାଇଛି । ପ୍ରତ୍ୟେକ ବର୍ଷ ପରି ଏବର୍ଷ ମଧ୍ୟ ମରିଚି କୁଣ୍ଡ ପାଣି ନିଲାମ କରାଯାଇଛି । ଏହି ଜଳକୁ ଗ୍ରହଣ କରିବା ସହ ସ୍ନାନ କଲେ ସନ୍ତାନ ପ୍ରାପ୍ତି ହୋଇଥାଏ ବୋଲି କାହିଁ କେଉଁ ଆବାହମାନ କାଳରୁ ଶ୍ରଦ୍ଧାଳୁଙ୍କ ମନରେ ବିଶ୍ୱାସ ରହିଛି । ନିଲାମ ଜଳକୁ ଗ୍ରହଣ କରିବା ପାଇଁ ନିଷ୍ଠାର ସହ ବହୁ ପରିବାର ଅପେକ୍ଷା କରିଥିବା ବେଳେ ରାତି ବାରଟା ସମୟରୁ ଏହି ନିଲାମ ପ୍ରଣାଳୀ ଆରମ୍ଭ ହୋଇଥିଲା । ପ୍ରକ୍ରିୟା ଅନୁସାରେ ତିନୋଟି ଡାକ ହୋଇଥିଲା । ପ୍ରଥମ ଘଡା ପାଣି ନିଲାମ ପାଇଁ ୨୦ହଜାର ୧୦୦ ଟଙ୍କା ସରକାରୀ ଡାକ ରହିଥିବା ବେଳେ ୨୧ହଜାର ଟଙ୍କାରେ ନିଲାମ ଶେଷ ହୋଇଥିଲା ।