ଭୁବନେଶ୍ୱର,୨୭/୦୧: ରାଜଧାନୀର ଭିଆଇପି ଅଞ୍ଚଳରେ ନେତାଙ୍କ ଘରୁ ଲୁଟ୍ । ଏହି ଘଟଣା ପରେ କେତେ ସୁରକ୍ଷିତ ରାଜଧାନୀ ବୋଲି ପ୍ରଶ୍ନ ସୃଷ୍ଟି ହୋଇଛି ? ନୟାପଲ୍ଲୀ ଅଞ୍ଚଳର ଥିବା ବରିଷ୍ଠ କଂଗ୍ରେସ ନେତା ନିରଞ୍ଜନ ପଟ୍ଟନାୟକଙ୍କ ଘରେ କଳାକନା ବୁଲାଇଛି ଚୋର । ଉପର ଘରୁ ଆଲମିରାର ଲକର ଭାଙ୍ଗି ପ୍ରାୟ ୫୦ ଲକ୍ଷ ଟଙ୍କାର ସୁନା ଗହଣା ଲୁଟି ନେଇଛି । କମିଶନରେଟ ପୁଲିସକୁ ଖୋଲା ଚ୍ୟାଲେଞ୍ଜ ଦେଇ ଚୋର ବୁଲାଇଛି କଳା କନା । ଗତକାଲି ଥିଲା ସାଧାରଣତନ୍ତ୍ର ଦିବସ । ଏଥିପାଇଁ ପୂର୍ବ ଦିନ ରାତିରୁ ସାରା ରାଜଧାନୀ କଡା ସୁରକ୍ଷା ବଳୟରେ ରହିଥିଲା । ଆସନ୍ତାକାଲିଠୁ ଉତ୍କର୍ଷ ଓଡିଶା ସମ୍ମିଳନୀ ପାଇଁ ପ୍ରଧାନମନ୍ତ୍ରୀ ଓଡିଶା ଆସିବେ । ଏଭଳି ସମୟରେ ନୟାପଲ୍ଲୀ ଭଳି ଭିଆଇପି ଅଞ୍ଚଳରେ ଥିବା ବଡ ନେତାଙ୍କ ଘରୁ ଚୋରି ହେବା ପୁଲିସର କାର୍ଯ୍ୟଦକ୍ଷତା ଓ ଆଇନଶୃଙ୍ଖଳା ପରିସ୍ଥିତି ଉପରେ ପ୍ରଶ୍ନବାଚୀ ସୃଷ୍ଟି କରିଛି । ସିସିଟିଭି ଫୁଟେଜକୁ ଯାଞ୍ଚ କରାଯାଉଛି । ଡଗ ସ୍କ୍ୱାର୍ଡ ଓ ସାଇଣ୍ଟିଫିକ ଟିମ ତନାଘନା କରିଛି । ଫରେନସିକ ଟିମ ପହଞ୍ଚି ତଦନ୍ତ କରୁଛି ।