ଭୁବନେଶ୍ୱର,୨/୦୪: ଭୁବନେଶ୍ୱର ସ୍ଥିତ ବଡ଼ଗଡ଼ ସରକାରୀ ଉଚ୍ଚ ବିଦ୍ୟାଳୟରୁ ଆରମ୍ଭ ହୋଇଛି ରାଜ୍ୟବ୍ୟାପି ପ୍ରବେଶ ଉତ୍ସବ ଓ ଖଡ଼ିଛୁଆଁ । ଶିଶୁ ବାଟିକାର ଶୁଭାରମ୍ଭ କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ପିଲାଙ୍କ ସହ ବସିଲେ, କଥା ହେଲେ ପିଲାଙ୍କ ମନରୁ ଭୟ ଦୁରେଇ ସ୍କୁଲ ଆସିବା ପାଇଁ ଉତ୍ସାହ କଲେ ମୁଖ୍ୟମନ୍ତ୍ରୀ । ଏଥିସହ ଆଜି ଆରମ୍ଭ ହୋଇଛି ରାଜ୍ୟରେ ଜାତୀୟ ଶିକ୍ଷା ନୀତି ୨୦୨୦ । ମୁଖ୍ୟମନ୍ତ୍ରୀଙ୍କ ଦ୍ୱାରା ଭୁବନେଶ୍ୱରରେ ଗଡ଼ିଛି ୪ ଶିଶୁ ବାଟିକା କାର୍ଯ୍ୟକ୍ରମ ପାଇଁ ସଚେତନ ଗାଡ଼ି ।ସୁନ୍ଦରଗଡ଼, ବଲାଙ୍ଗୀର, କେନ୍ଦ୍ରାପଡ଼ା ଓ କଟକ ସମେତ ସାରାରାଜ୍ୟରେ ସରକାରଙ୍କ ପକ୍ଷରୁ ଶିଶୁ ବାଟିକାର ଶୁଭାରମ୍ଭ କରାଯାଇଛି । ଛାତ୍ରଛାତ୍ରୀଙ୍କୁ ଖଡ଼ି ଛୁଆଁଇ ପ୍ରବେଶ ଉତ୍ସବ ପାଳନ କରିଛନ୍ତି ରାଜ୍ୟ ସରକାର ।
ପୋଷଣ ଯୋଜନାରେ ପୂର୍ବରୁ ରାଜ୍ୟରେ ପ୍ରଥମରୁ ଅଷ୍ଟମ ଶ୍ରେଣୀ ପିଲାଙ୍କୁ ମଧ୍ୟାହ୍ନ ଭୋଜନ ଦିଆଯାଉଥିଲା । ରାଜ୍ୟ ସରକାର ୨୦୨୫-୨୬ ଶିକ୍ଷାବର୍ଷରୁ ସିଏମ୍ ପୋଷଣ ଯୋଜନାରେ ଏଣିକି ନବମ ଓ ଦଶମ ଶ୍ରେଣୀ ପିଲାମନଙ୍କୁ ମଧ୍ୟ ପୃଷ୍ଟିକର ମଧ୍ୟାହ୍ନ ଭୋଜନ ଯୋଗାଇ ଦେବେ । ଏଥିପାଇଁ ୫୭୦ କୋଟି ୭୧ ଲକ୍ଷ ବ୍ୟୟରେ ପ୍ରାୟ ୧୦ ଲକ୍ଷ ୮୦ ହଜାର ଅତିରିକ୍ତ ଛାତ୍ରଛାତ୍ରୀ ଲାଭ ପାଇବେ ।