ନୂଆଦିଲ୍ଲୀ,୨୯/୦୧: ଦିଲ୍ଲୀ ବିଧାନସଭା ନିର୍ବାଚନ ପାଇଁ ରାଜନୈତିକ ମାହୋଲ ସରଗରମ ରହିଛି । ରାଜଧାନୀ ଦିଲ୍ଲୀରେ ଉତ୍ତେଜନା ମଧ୍ୟରେ କଂଗ୍ରେସ ନିଜର ଇସ୍ତାହାର ଜାରି କରିଛି । କଂଗ୍ରେସ ନିଜ ଇସ୍ତାହାରରେ ମହିଳା ଓ ଯୁବକଙ୍କ ପାଇଁ ଅନେକ ପ୍ରତିଶ୍ରୁତି ଦେଇଛି । ପ୍ରତି ଗରିବ ପରିବାରର ଜଣେ ମହିଳାଙ୍କୁ ମାସିକ ୨୫୦୦ ଟଙ୍କା ଦିଆଯିବ ବୋଲି କଂଗ୍ରେସ କହିଛି । କଂଗ୍ରେସ ଇସ୍ତାହାରରେ ଓ୍ଵାକଫ୍ ବୋର୍ଡ ପାଇଁ ସବୁଠାରୁ ବଡ଼ ଘୋଷଣା କରାଯାଇଛି। କଂଗ୍ରେସ ଇସ୍ତାହାରରେ କୁହାଯାଇଛି ଯେ ସେମାନେ ଏକ ୱାକଫ୍ ବୋର୍ଡ ଗଠନ କରିବେ ଏବଂ ଇମାମମାନଙ୍କୁ ଠିକ୍ ସମୟରେ ଭତ୍ତା ଦେବେ । ସଂଖ୍ୟାଲଘୁଙ୍କ ଉପରେ ଗୁରୁତ୍ୱ ଦିଆଯିବ ବୋଲି କଂଗ୍ରେସ ନିଜ ଇସ୍ତାହାରରେ ପ୍ରତିଶ୍ରୁତି ଦେଇଛି । ୧୦୦ ଟି ଇନ୍ଦିରା କ୍ୟାଣ୍ଟିନ ଖୋଲିବା ସହ ୫ ଟଙ୍କାରେ ଖାଦ୍ୟ ଯୋଗାଇବାକୁ କହିଛି କଂଗ୍ରେସ।
କଂଗ୍ରେସ ୫୦୦ ଟଙ୍କାରେ ଏଲପିଜି ସିଲିଣ୍ଡର ଯୋଗାଇ ଦେବାକୁ ପ୍ରତିଶ୍ରୁତି ଦେଇଛି । ପ୍ରତି ମାସରେ ୫ କେଜି ଚାଉଳ, ୨ କେଜି ଚିନି, ୧ କେଜି ରୋଷେଇ ତେଲ, ୬ କେଜି ଡାଲି, ୨୫୦ ଗ୍ରାମ ଚା’ ପତ୍ର ଓ ମାଗଣା ରାସନ କିଟ୍ ଦିଆଯିବ ବୋଲି ଦଳ କହିଛି। ପ୍ରତି ଗରିବ ପରିବାରର ଜଣେ ମହିଳାଙ୍କୁ ମାସିକ ୨୫୦୦ ଟଙ୍କା ଦିଆଯିବ। ଆମେ କର୍ଣ୍ଣାଟକରେ ଏହି ଯୋଜନା କାର୍ୟ୍ୟକାରୀ କରିଛୁ, ଦିଲ୍ଲୀରେ ମଧ୍ୟ କରିବୁ ।
ଦିଲ୍ଲୀର ସମସ୍ତ ବାସିନ୍ଦାଙ୍କୁ ୨୫ ଲକ୍ଷ ଟଙ୍କା ପର୍ୟ୍ୟନ୍ତ ମାଗଣା ଚିକିତ୍ସା ଯୋଗାଇ ଦିଆଯିବ ବୋଲି କଂଗ୍ରେସ ପ୍ରତିଶ୍ରୁତି ଦେଇଛି । ଏଥିରେ ମାଗଣା ଔଷଧ ଓ ପରୀକ୍ଷା ମଧ୍ୟ ରହିବ। ସରକାରୀ ହେଉ କି ବେସରକାରୀ ସମସ୍ତ ବେକାର ଯୁବକଯୁବତୀଙ୍କୁ କଂଗ୍ରେସ ଏକ ବର୍ଷର ଆପ୍ରେଣ୍ଟିସିପ୍ ପ୍ରଦାନ କରିବ ଏବଂ ଏହି ସମୟରେ ସେମାନଙ୍କୁ ମାସିକ ୮,୫୦୦ ଟଙ୍କା ମିଳିବ । କର୍ଣ୍ଣାଟକରେ ଏହି ଯୋଜନା କାର୍ୟ୍ୟକାରୀ ହୋଇଛି , ଦିଲ୍ଲୀରେ ମଧ୍ୟ ହେବ ବୋଲି କହିଛି କଂଗ୍ରେସ।