ଭୁବନେଶ୍ୱର,୫/୧୧: ନୂଆଦିଲ୍ଲୀରୁ ପୁରୀ ଅଭିମୁଖେ ଆସୁଥିବା ନନ୍ଦନକାନନ ଏକ୍ସପ୍ରେସ ଟ୍ରେନ ଆଜି ଗୁଳିମାଡ଼ ହୋଇଥିବାର ଖବର ମିଳିଛି । ଭଦ୍ରକ-ବାଉଦପୁର ସେକସନ୍ ମଝିରେ ଏହି ଗୁଳିମାଡ଼ ହୋଇଥିବା ଜଣାଯାଇଛି। ତେବେ ଏଥିରେ କେହି ମୃତାହତ ହୋଇ ନ ଥିବା ଜଣାଯାଇଛି। ଏପରି ଏକ ଅଭାବନୀୟ ଘଟଣା ଆଜି ଭଦ୍ରକ ଷ୍ଟେସନର ୧୧୯ ନଂ ଗେଟ ନିକଟରେ ଘଟିଛି। ଟ୍ରେନ୍ ଉପରକୁ ଗୁଳି ମାଡ଼ ହୋଇଥିବା ନେଇ ନନ୍ଦନକାନନ ଏକ୍ସପ୍ରେସର ଟ୍ରେନ ଗାର୍ଡ ଅଭିଯୋଗ କରିଛନ୍ତି।
ଏହା ଫାୟାରିଂ ନା ଆଉ କିଛି ତାହାର ତଦନ୍ତ ଆରମ୍ଭ କରିଛି ପୁଲିସ୍। ଏଥିସହ ଏହା ଗୁଳିମାଡ଼ ଘଟଣା ହୋଇଥିଲେ କିଏ ଓ କାହିଁକି ଏପରି କାଣ୍ଡ ଘଟାଇଛି ତାହା ଉପରେ ବି ତଦନ୍ତ ଚାଲିଛି। ନୂଆଦିଲ୍ଲୀରୁ ଭୁବନେଶ୍ୱର ଅଭିମୁଖେ ଆସୁଥିବା ନନ୍ଦନକାନନ ଏକ୍ସପ୍ରେସ ଟ୍ରେନ ଆଜି ମଧ୍ୟାହ୍ନ ସମୟରେ ଭଦ୍ରକ ଷ୍ଟେସନ ଅତିକ୍ରମ କରୁଥିଲା। ଏହାପରେ ତୁରନ୍ତ GRP ପୁଲିସ୍ ଓ ସ୍ଥାନୀୟ ପୁଲିସ୍ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛନ୍ତି। ଟ୍ରେନ୍ ଲାଇନ୍ରୁ କୌଣସି ଗୁଳି ମିଳି ନାହିଁ । ସେଠାରେ ନୂଆ ଟ୍ରେନ ଲାଇନ କାମ ହେଉଛି । ବଡ଼ ବଡ଼ ବୋଲଡର ଛିଟିକି ପଡିଛି କିମ୍ବା ସତରେ ଫାୟାରିଂ ହୋଇଛି ତାହାର ତଦନ୍ତ ଜାରି ରହିଛି।